Kɔrɔkun balɔ᷇ soobun yigbεru “Gbee kεtε” ba Kuurun “Gbeekù musukuba” di ben kpaarɔ 1 ka 0. Arusuma buu 05/26/19 yera ba yinna kuurun balɔ᷇ kɔ᷇ɔ yerɔ.
Balɔ᷇ yè ba di mini mi ya dera ba tie ba goniru yara. Ba Gbεmgbεrεkεgibu gbiiyawa mi ka 4. Gbεmgbεrεkεgiiben tii ba asibiti sɔnu Sɔlεyi di 2 ka 1 ma ba tie ba Kɔrɔkugibu koru gire. Mìn di ba balɔ᷇ yen wuramabu soobu toruwa Kɔrɔkugibun nɔm itaserun diiba mi adama 1 ka 0 yera ba dimɔ ba ka dɔɔ. Ya de dera ba tie ba goniru nεni ma ba mɔ 55 baa ka mɛ̀ Bekegibu ba bù naa gire ba mɔ 51. Bekegibun tii ba kasu bù nεε be ba gbia sanam mɛ̀ balɔ᷇n garasa yeni ya tie nde soobu 4n saka.
Kuurugibun nuki kùn dore. Ba sibu kpenu kasuka ma baa poliisi ba maa bu nonin woo kɔ᷇su gen dɔ᷇ɔ kurenu kasuka. Ben tii, ba raa yiyɔ bù maa kookari ko bù wiru yari. Adama ka wɔruma yè ba kua ben tiin wuuwɔ mini, ya kpawa mi.
Saa mìn di durɔ wi Haruna HAMIDU u Kɔrɔkun balɔ᷇ kɔ᷇ɔbun yigbε ten wiru mua, win nɔm itasen diiba mi, adama 1 ka 0 yera nàn mi. Ya sa᷇a nde yen naanε ya ka nε. Ba kù ra nε ba n yɛ᷇, ka Bekegibu bàn na ba dooru nεra, bii geeni ba sibu wɛ᷇ ka nì siba bù wɛ᷇ nia ba koo ka bù karanasia. Ka mε, siba doke balɔ᷇ yè ya raa bè sɛ᷇sɔ᷇ kereeye, yera ba so ba di mini. Yè ba ku ràn yε baasi, Gbèe Kεtε be ba maa goniru yarin dɔɔwa mi Benε tem mì.